Նահապետավան

Նահապետավան, (Наhапетаван, Nahapetavan), Խաչաքիլիսա, Խաչիքիլիսա, Փարոս - Գյուղ ՀԽՍՀ Արթիկի շրջ-ում, Արթիկ ք-ից փոքր-ինչ հր-արլ, Արագած լ-ան հր-արմ ստորոտին, գեղատեսիլ սարավանդի վրա: 1935թ հունվարի 3-ին վերանվանվել է Փարոս, 1961-ի հունվարի 30-ին` Ն` ի հիշատակ 1920թ մայիսյան ապստամբության մասնակից Նահապետ Կուրղինյանի: Ունի լ-նային խիստ կլիմա: Առանձնատները 1-2 հարկանի են, տուֆաշեն ու ճաշակավոր:1837թ ուներ 293, 1897թ` 465, 1926թ`622, 1939թ` 518, 1959թ` 647, 1970թ` 655, 1979թ` 650 հայ բնակիչ, որոնց մի մասի նախնիները այստեղ են փոխադրվել Հառիճ գ-ից 1863թ: Միավորված է Հառիճի կաթնանասնապահական պետական տնտեսությանը: Զբաղվում են նաև դաշտավարությամբ, ճակնդեղագործությամբ, բանջարաբուծությամբ: Գ ունի 8-ամյա դպրոց, ակումբ, գրադարան, բուժկայան: Եկեղեցին կոչվում է ս Գևորգ` կառուցված 6-րդ դ: Այստեղ է ծնվել Նահապետ Կուրղինյանը: